Министерот за внатрешни работи, Панче Тошковски, утрово добил смс-порака за сообраќаен прекршок констатиран од системот „Безбеден град“ – и тоа за надминување на брзината за само 1 км/ч. Прекршокот бил регистриран додека со приватно возило патувал кон Кавадарци, каде денеска се одржува партискиот конгрес. Тошковски наведува дека токму овој случај најдобро ја илустрира суштината на системот: законот да важи подеднакво за сите.
„Системот важи и постапува еднакво кон сите и ако регистрира прекршок – санкцијата следи, без разлика кој е во возилото. Нема исклучоци, нема селективност, нема привилегирани,“ порача министерот.
Тој додаде дека управувањето со возило е обврска, а не привилегија, и дека ваквиот пристап гради доверба, дисциплина и поголема безбедност на патиштата.
Според Тошковски, целта на „Безбеден град“ не е казнување, туку воспоставување ред и спасување човечки животи, особено во време кога бројот на жртви во сообраќајот е загрижувачки висок.
„Државата ќе биде посигурна само ако законите важат подеднакво за сите, вклучувајќи нè и нас кои сме најодговорни за нивното спроведување,“ истакна министерот.
