Македонија трета во Европа по нивото на економски раст, веднаш зад Ирска и Данска. Зголемувањето на БДП во третиот квартал изнесува 3,8%, што е повеќе и од земјите во регионот, од Србија со Црна Гора, Бугарија . Најголем придонес кон растот на економијата има зголемувањето на бруто инвестициите од 30,6%. За министерката за финансии Гордана Димитриеска Кочоска тоа е доказ дека во Македонија владее поволна бизнис клима и е позитивен сигнал за странските инвеститори. Во овој дел таа ја истакна реализацијата на капиталните инвестиции, повлекувањето на средства од поволниот унгарски заем од страна на домашните компании за вложување во производство, како и инфраструктурните проекти на општините.
Сектор кој најмногу придонел кон растот во третиот квартал било градежништвото со зголемување на активностите за 21%. Следат информациите и комуникациите кои се во позитива од 7,4, како и земјоделството со 4%. Димитриеска Кочоска е особено задоволна со остварените резултати во нискоградбата, кадешто активностите се зголемиле за рекордни 58,5%. Таа очекува бум иво високоградбата, особено откако финансии одлучи да ја задржи повластената стапка на ДДВ од 5% за купување нов стан директно од инвеститор.
Кумулативно растот во првите 9 месеци изнесува 3,4%. Министерката вели дека има огромен интерес за вложување во граѓанската обврзница од страна на населението и очекува надминување на првично предвидениот износ. Таа исто така не гледа ништо спорно во прераспределбата на средства меѓу буџетските корисници, односно мини ребалансоткој последниве години се прави стандардно во последниот месец од годината. На овој начин се прераспределуваат пари од една за друга намена во Министерството за одбрана и се додаваат средства за исплата на пензии, транзициски трошоци кон вториот пензиски столб и за здравствена заштита на пензионерите.
