Украина се соочува со засилен притисок од САД да го прифати новиот американски план за завршување на војната со Русија, вклучувајќи закани за прекин на разузнавачка поддршка и снабдување со оружје, пренесуваат за „Ројтерс“ два добро упатени извора. Еден од нив тврди дека Доналд Трамп очекува Украина да го потпише нацрт-договорот до 27 ноември.
„Тие сакаат да ја сопрат војната и сакаат Украина да ја плати цената“, изјави еден од изворите.
Володимир Зеленски потврди дека е подготвен да разговара со САД откако го добил нацртот на новиот план, кој од Украина бара сериозни отстапки. Според пишувањата на неколку американски медиуми, планот предвидува Украина да го предаде регионот Донбас во целост, да ја преполови својата војска и да се обврзе дека нема да се приклучи кон НАТО — барања кои досега беа неприфатливи за Киев. Остатокот од фронтот би останал замрзнат на сегашните линии.
Документот предвидува и намалување на украинската војска на 600.000 припадници и предавање дел од вооружувањето, додека европски борбени авиони би биле стационирани во Полска како дел од „цврстите безбедносни гаранции“. Планот опфаќа и реинтеграција на Русија во светската економија преку укинување на санкциите, враќање во групата Г7 — која повторно би станала Г8 — и префрлање на замрзнатите руски средства во инвестициски фонд.
Зеленски, кој вчера се сретна со висока американска воена делегација во Киев, најави дека ќе разговара со Доналд Трамп во следните денови.
