Вкупно 79 повредени луѓе во судар на два воза во Словачка

Вкупно 79 лица се повредени во судар на два патнички воза во близина на главниот град на Словачка, Братислава, објавија локалните медиуми. Сите се хоспитализирани, но ниту еден не е во животно загрозувачка состојба, соопшти словачката итна медицинска служба. Прелиминарните извештаи укажуваат дека регионалниот воз занемарил знак за запирање и минал на пруга кон Братислава, каде се судрил со брз воз. Точните причини за несреќата се истражуваат. Телевизијата STV извести дека во двата воза во моментот на несреќата имало околу 800 патници, меѓу кои и многу студенти кои се враќале во Братислава од родните градови.