Процесите за изградба на Факултет за медицински науки и на Студентски дом во Штип се во тек, изјави денеска ректорот на Универзитетот „Гоце Делчев“ (УГД)-Штип, Дејан Мираковски, кој присуствуваше на првиот академскиот час за студентите кои се запишаа во прва година на 12 факултети и трите академии на УГД-Штип. Мираковски на новинарско прашање дали има информации за кога ќе започне изградбата на овие два значајни објекти за градот Штип одговори дека штипскиот Универзитет „Гоце Делчев“ не го води овој процес, туку надлежни се ресорните министерства.
-Универзитетот „Гоце Делчев“ не го води дирекнто тој процес. Меѓутоа ние ќе учествуваме преку одредени работилници со проектантите, коишто ќе го изработуваат целиот проект. Колку што знам имаше првични контакти преку Министерството за образование. Целиот процес го водат два дела Министерството за здравство ја води изградбата на болницата, а од нас беа побарани мислења за големината на објектот, типот на објектот, какошто се за типот на училници, амфитатри којшто ни се потребни, како и за уредување на академскиот дел, односно за факултетскиот дел на тој објект, вели Мираковски.
Тој додаде дека за Студентскиот дом анализата треба да се направи од страна на проектантите. Факултетот за медицински науки ќе се гради веднаш до новиот објект на штипската Клиничка болница, а во нивна близина ќе се гради и нов Студентски дом, со капацитет до 200 легла. Овие два објекти треба да ги проектират реномирани компании од Обединетотот кралство.
