Се одложи изборот за нов претседател на Советот на јавни обвинители.
Членовите не сакале изборот да биде мета на политичката кампања за изборите, па нов човек на институцијата ќе бирале откако ќе заврши целиот изборен процес. Едногласно ја донесоа таа одлука, а се сложи и републичкиот обвинител Љупчо Коцевски, бидејќи, како што кажаа, секогаш правосудството било мета во предизборие.
Во меѓувреме, медиумите објавија текстови за местење на целиот процес. Наводно, за нов претседател треба да биде изгласан Башким Бесими, кој е стрико на поранешниот министер за финансии од редовите на ДУИ, Фатмир Бесими. Како што објавија некои медиуми, кадри блиски до СДСМ и до ДУИ кои се дел од Советот на јавните обвинители, лобираат да се случи тој избор со цел заташкување на предметите кои се веќе отворени за Артан Груби и за Перпарим Бајрами, но и за модуларната болница, случај во кој првостепено е осуден екс директорот Флорин Бесими, внук на обвинителот Башким Бесими и брат на поранешниот министер за финансии Фатмир Бесими.
Според натписите, и државниот обвинител Љупчо Коцевски активно лобирал кај членовите на Советот да гласаат Башким Бесими да биде избран за прв човек на оваа институција.
