Што побрзо финишираат инфраструктурните проекти, толку поголем ќе биде економскиот раст. Бизнисот бара изградбата на патишата и пругите да биде приоритет за власта, а овие проекти да се завршуваат во предвидените рокови. Најавите дека догодина ќе продолжи изградбата на автопатот од Скопје до Блаце и ќе стартува брзата пруга Табановце – Гевгелија се клучни за стопанствениците. Велат тоа ќе го забрза транспортот на стоки, ќе го олесни водењето бизнис, ќе ја зголеми трговската размена.
Според последните статистички податоци, индустриското производство во првите 8 месеци пораснало за 2,2%. Кај преработувачката индустрија, зголемувањето е 3,8%. За бизнисот, достижни се амбициите за економски раст од над 3%, како што предвидува Европската банка за обнова и развој. Според Сојузот на стопански комори, поголем раст е можен ако повеќе се обрне внимание на стимулирање на микро, малите и средни претпријатија.
Кога расте економијата, се зголемуваат и примањата на работниците. Просечната нето плата во земјава достигна 736 евра. За 12 месеци, платите се покачиле за речиси 5 илјади денари или за 10 и пол отсто. Тоа е шести најголем пораст на примањата во Европа. Од октомври и пензионерите ќе добијат плус илјада денари линерно зголемување. Со ветените уште илјада денари на пролет, највозрасната категорија граѓани, ќе има плус 7 илјади денари покачување на примањата за 18 месеци.
