Македонија меѓу државите во Европа со најголем раст на платите изминатава година. Земјава се најде на високото, 6-то место во Европа, според зголемувањето на просечната нето-плата за 12 месеци од 10 и пол отсто, односно за речиси 5 илјади денари. За премиерот Мицкоски, овие позитивни резултати се доказ дека опозицијата лаже кога обвинува дека платите во Македонија не растат.
Просечната нето-плата во јули годинава изнесува 45.276 денари и е повисока од 10 и пол отсто споредено со истиот месец лани. Најголем скок на платите се забележува во административните и помошни услужни дејности од дури 16,5 проценти. Следуваат образованието со пораст на примањата од 15 отсто и здравството и социјалната заштита, со 14,8 проценти. Премиерот претходно напомена дека е нормално работниците никогаш да не бидат задоволни од висината на примњата и дека Владата се труди да работи повеќе за да обезбеди дополнителни средства, односно да создаде поволна деловна средина за бизнисот да се развива и да можат работниците да добијат повисока плата.
Освен платите растат и пензиите. Од задутре на сметките на највозрасните граѓани ќе легнат по илјада денари повеќе, а напролет ќе има зголемување уште за по илјада. Со тоа вкупниот раст на пензиите за две години ќе биде 7 илјади денари.
