Лидерот на ДУИ Али Ахмети во свој стил, очекувано, предизборно го вжештува национализмот и подгрева етнички тензии. Со закани, ултиматуми, предвидувања. Ако се продолжело со овие политики, Македонија ќе се распарчела. Не може вели да се оди напред, без Албанците
Овие провокации се уште еден показател дека ништо друго не му остана освен стариот истрошен адут – национализмот.
Денес, поголем патриотизам е да ги зближуваш народите. Како не земат пример од спогодбата меѓу Франција и Германија. И сега сета кампања ја прават, „Македонија повторно твоја“. А чија? Ако влегуваме така, да ја распарчиме, ќе се распарчи кутрата. Македонија како цела треба да биде дел од ЕУ. Не може да биде во ЕУ без Албанците, не се оди вака напред со патриоти на батерии. рече Ахмети.
На собирот во Тетово Ахмети пред гласачите повторно се претставуваше како месија и спасител на етничките Албанци во Македонија кои обединети ги бранеле еднаквоста и европската иднина на Македонија. Нивното единство вели било гаранција дека никој не можел да ги запре.
Во недостиг на резултати, решенија и програми Ахмети се служи со политички провокации, до толку повеќе што предвидува поделби и загрозување на територијалниот интегритет на Македонија.
Али Ахмети се служи со бајата реторика. Никој, апсолутно никој не може да каже, каде и какви поделби ќе има, не може тој да зборува за територијалниот интегритет. Тоа само зависи од геополитичките случувања. Овде кај нас, само цвета национал-романтизмот, вели политичкиот аналитичар Агим Јонуз.
Ова не е прв пат Aхмети да се служи со провокации, посебно пред избори. Па така, лани пред парламентарните и претседателските избори, на своите митинзи постојано испраќаше националистички тонови. Се служеше со констатации од типот: „УЧК ја спаси Македонија, без неа, немаше да постои“, или кога му се обраќаше на Мицкоски со зборовите „Не си ја барај бељата, ти си растен со гурабии и бисквити“, а си отвори и музеј на УЧК со картата на „голема Албанија“.
Во меѓувреме,ДУИ реагираше дека медиумите се служеле со тенденциозни наслови и тврдења за надводна поделба на државата отфрлајќи ги тие квалификации како неточни и двосмислени.
Во изјавата било потенцирано дека целта е Македонија да стане дел од Европската Унија, без притоа воопшто да се спомене поделба.
