Народната банка засега не планира да ја намали основната каматна стапка. Ова беше одговорот на гувернерот на Народната Банка Трајко Славески откако американските Федерални резерви минимално ја намалија основната камата, а Европската централна банка одлучи да не ја менува при инфлација во Европа од околу 2%. Славески е задоволен што инфлацијата во Македонија забавува во последниот месец. Сепак, вели дека централната банка ќе постапи соодветно на околностите и присутните ризици согласно движењето на базичната инфлација и на евентуално непредвидливи шокови во иднина.
Инаку, од декември младите парови и самци треба да добијат поповолни услови при прво купување стан за живеење, а не за инвестирање. Гувернерот Славески рече дека очекува банките во следните два и пол месеци да се подготват и да понудат станбени кредити со 10% учество за купување стан или куќа. Според него, семејствата коишто за прв пат купуваат стан и живеат во него или куќа се помал ризик од аспект на сервисирање на обврските. Затоа тој смета дека тие треба да добијат поповолни услови за кредитирање од страна на комерцијалните банки.
Инаку, Македонија планира да влезе во системот на инстант плаќања заедно со останатите земји од Западен Балкан. Гувернерот Славески на 15 октомври во Вашингтон ќе го потпише писмото на намери со кое земјава ќе влезе во системот на инстант плаќање. На 1 јули 2025 земјава официјално стана дел од Единствената област за плаќање во евра (СЕПА). Ова членство треба да го олесни испраќањето и примањето пари од странство, да ги намали трошоците за трансакции и да ја подобри брзината и сигурноста на плаќањата во евра.
