На полноќ завршува увидот во Избирачкиот список за локалните избори што ќе се одржат во октомври. На 13 септември на полноќ завршува и рокот за доставување на листите за кандидати за градоначалници и за советници, по што учесниците на изборите забрзано ќе ги започнат активностите околу изборната кампања.
На изборите што се закажани за 19 октомври ќе се гласа во 80 општини и во Градот Скопје, на вкупно 3.480 избирачки места.
Иако активностите на терен одамна се започнати и дел од кандидатите пред граѓаните веќе ги презентираат своите изборни ветувања, официјалната кампања ќе започне на 29 септември.
Граѓаните јавниот увид можат да го направат во подрачните одделенија и канцеларии на Државната изборна комисија (ДИК). Тие можат да поднесат писмено барање за запишување, дополнување или бришење на податоците во изводите на Избирачкиот список до подрачното одделение на ДИК или месната канцеларија на подрачјето на живеење, како и по електронска пошта.
Увид во Избирачкиот список е овозможен и за затворениците.
