Месечната инфлација во август забавува – потрошувачките трошоци за живот се зголемени за 0,2%, што е значително помалку споредено со месечната стапка во јули, која изнесуваше 1,1%.
Месечната инфлација на храната и безалкохолните пијалоци изнесува 0,6%. Во одредени групи на производи забележано е намалување на трошоците: риба и морски плодови (-0,9%), масла и масти (-0,1%), овошје (-1,5%), шеќер, џем, мед, чоколада и кондиторски производи (-0,2%), останати прехрамбени производи (-0,9%), минерална вода, безалкохолни пијалоци, сокови од овошје и зеленчук (-1,1%), кафе, чај и какао (-0,2%).
Малиот месечен раст на индексот на трошоци за храна и безалкохолни пијалоци се должи главно на зголемените цени на зеленчукот, кои забележаа раст од 4,9%. Овој тренд е присутен подолг период во целиот регион, поради намалените приноси и понудата како резултат на неповолните временски услови.
На годишна основа, инфлацијата исто така забавува. Во август стапката на инфлација изнесува 4,4%, намалена во споредба со јули кога беше 4,8%. Годишната инфлација на храната бележи ист тренд на забавување, изнесувајќи 5,4%, наместо 6% во јули.
