Дивата депонија Вардариште се наметна како една од главните теми во предизборитето во Скопје. Продлужваат протестите на мостот „Блзинак“ со кој се бара нејзино итно отстранување.
Во меѓувеме Основното јавно обвинителство Скопје отвори истрага против тројца скопјани, осомничени дека на локацијата Вардариште создавале нови диви депонии со што го загрозиле животната средина и јавното здравје. Обвинителството побара притвор за сите тројца поради опасност од бегство, влијание врз сведоци и можност да го повторат делото.
Станува збор за М.М. (54), А.А. (28) и Ф.А. (41), против кои Министерството за внатрешни работи поднесе кривични пријави по брза постапка. Тие се сомничат за кривично дело „Загрозување на животната средина и природата со отпад“.
Според истрагата, осомничените подолг временски период, се до 2 септември оваа година, на улицата „Зендел Џемаил“ во близина на Вардариште, незаконски вршеле откуп и складирање на старо железо, акумулатори и други метални производи. Делувале без регистрирано правно лице, без деловна ознака и без дозвола за управување со отпад, која ја издава Министерството за животна средина и просторно планирање.
Од Обвинителството информираат дека тројцата осомничени отпадот го оставале, фрлале и транспортирале на непрописен начин, со што создале диви депонии кои значително го нарушиле квалитетот на почвата и воздухот, а со тоа предизвикале и потенцијална опасност по животот и здравјето на граѓаните.
