По вчерашната средба со кардиохирургот Сашко Кедев, министерот за здравство Азир Алиу, денеска одржа состанок и со комисијата задолжена за подготовка на анализа на кардиолошките и кардиоваскуларните интервенции во здравствените установи во земјата, во врска со наводите дека се вршеле непотребни кардиохируршки интервенции кај пациенти во приватните болници.
Интерната комисија е составена од врвни експерти во областа – правници и економисти, а е формирана со цел собирање, обработка и анализа на податоци, со посебен фокус на периодот од 2022 до 2025 година, во јавните и приватните здравствени установи. „Очекувам комисијата да подготви објективни резултати, кои произлегуваат од максимално професионален и независен процес. Наодите ќе бидат клучни за реално утврдување на состојбите“, рече Алиу.
Истовремено, Министерството за здравство испрати допис до јавните здравствени установи со кој ги повика да достават податоци за вкупниот број извршени кардиолошки и васкуларни операции во периодот од јануари 2022 до август 2025 година. Дополнително, приватните здравствени установи, почнувајќи од 15 септември, ќе имаат обврска да го информираат ресорното министерство за сите извршени прегледи и интервенции, односно да ги евидентираат во „Мој термин“.
