Поднесен е обвинителен предлог против поранешната претседателка на Антикорупциска, Татјана Димитровска, и уште двајца обвинети за оддавање службена тајна, информираат од Кривичниот суд.
Заедно со предлогот, до судот е доставено и барање за спојување на обвиненијата со предметот „Адитив“, за кој ќе се одлучува во наредниот период. Овој предмет е поврзан со злоупотреби во државната компанија ЕСМ и фиктивни тендери вредни милиони евра.
Димитровска е обвинета дека пренесувала информации на поранешниот директор на ТЕЦ Неготино, кој исто така е опфатен во предметот „Адитив“.
Истрагата за овој процес опфати над 30 лица, меѓу кои и поранешни директори и функционери. Обвиненијата опфаќаат злосторничко здружување, злоупотреба на службена положба, перење пари и оддавање службена тајна.
