И покрај ваквата одлука на ДИК, граѓанската иницијатива „Шанса за центар“ не се откажува од намерата, заедно со останатите групи да регистрираат политичка партија пред изборите.
„Да, го намалија прагот за учество на изборите, но еве зошто ќе продолжиме да собираме потписи за основање на политичката платформа Независни заедно. Овој правилник ќе важи само за овие избори. Не сакаме повеќе неизвесност ’пет до дванаесет’. Постои можност наместо јасна листа за гласање, да добиеме тетратка со голем број имиња, каде партиите ќе бидат најгоре, а под нив ќе следат долги списоци со имиња,“ велат од иницијативата.
Од таму додаваат дека и покрај одлуката на ДИК, продолжува примената на членот од Законот според кој независните групи ќе бидат претставени само со имињата на носителите на листите, наместо со називот на групата, односно ќе стои група избирачи и името и презимето на носителот на листата.
„Ова отвора можност да се појават слични имиња со цел да се создаде забуна кај гласачите,“ предупредуваат од иницијативата.
