Црна Гора е во пламен. Главниот град Подгорица е буквално во огнен обрач од големиот пожар кој првично избил кај Чањ, а потоа се проширил во сите правци. Криитично е и кај Бар, Будва, Никшиќ, Шавник и Бијело Поље, каде огнената стихија остава пустош зад себе. Повеќе од сто војници со хеликоптери и специјализирана опрема неуморно гаснеа пожари низ целата земја, спречувајќи го пожарот да се прошири на домаќинствата.
‘’ Мојата сопруга околу 6 часот наутро, панично ме разбуди со повици за пожар. И пожарот навистина беше од огромни размери. Особено во оној предел лево.’’
‘’ Утрината околу 3 часот имаше вистинска борба со огнот. И сега што ќе се случи никој не знае.’’
Црногорската влада веќе побара помош од НАТО и преку механизмот за цивилна заштита на Европската Унија. Први кои се одзваа на повикот се соседна Хрватска и Србија.
Кај Погорица, припадниците на Службата за заштита и спасување спасија мајка со четри годишно дете, а пожарникарите најдоа и луѓе кои се криеле во своите подруми, преплашени од пожарот.
‘’ Се наоѓаме на едно исклучително, да кажам, урбано, густо населено подрачје што додатно ја отежна ситуацијата и општо акцијата на гаснење и спасување.’’
Првичните информации се дека пожарите се разгореле откако во Буљарица се запалил автомобил на албански државјанин, огнот се проширил на непристапен терен, стигнал до Чањ а потоа и на други места.
На социјалните мрежи е објавено видео од плажата во Петровац, на кое се гледа како густиот чад го прекрива небото. Чадот доаѓа од правец на Чањ и Буљарица, а според достапните информации, пожарот е целосно надвор од контрола, а ветрот дополнително го отежнува гаснењето.
Според информациите од медиумите, најкритично е и понатаму во Пипери, каде што синоќа се појавија нови жаришта во Дрезга и Церовица.Освен во Пипери, лоша е состојбата и на Какаричка гора, а патот кон Кучи е затворен. Гори и во Рогами, на Смоковац, во Кокоти, Комани, Зета и Барутана.
Новинар Кристијан Ниновски.
