Вонредна инспекција за смртта на 30-годишната жена која почина на инфективното одделение во тетовската болница. Државниот санитарен и здравствен инспекторат ќе го истражува случајот, а според Министерството за здравство, јавноста ќе биде навремено известена по завршувањето на постапката за утврдување на фактичката состојба.
Според пријавеното во МВР, таа била примена на болничко лекување вчера во 19:00 часот и, наводно, според кажувањата на најблиските на починатата, не ѝ била укажана соодветна лекарска помош, по што починала. Полициски службеници од СВР Тетово излегле на местото и по однос на пријавата бил формиран тим за испитување на настанот, кој ќе го води дежурен јавен обвинител во содејство со екипа од СВР Тетово, се вели во соопштението од МВР.
