🎥 Нова опрема и реновирани сали на Клиниката за уво, нос и грло

Современа медицинска опрема за дијагностика и реновирани операциони сали,  според светски стандарди доби Клиниката за уво, нос и грло во Скопје. Со ова се зголемува квалитетот на услугите за  пациентите и се овозможува подобра обука на  помладите лекари. Министерот Азир Алиу е задоволен од тоа како се движат работите во македонското здравство. Според него, трите столба што се мапирани како важни– инфраструктура, човечки ресурси и технологија, полека, но сигурно станува реалност.

“Четири операциони сали се од темел реновирани, со најнова технологија која овозможува следење на сите стандарди на највисоко ниво. Во однос на кадровската политика, веќе се вработени тројца специјализанти, од кои двајца специјалисти ОРЛ и еден специјализант по анестезиологија и интензивно лекување, пет медицински сестри, како и тројца администратори, што ќе придонесе кон потранспарентно здравство кое што е поблиску до граѓаните, согласно европските стандарди,” изјави министерот за здравство Азир Алиу.

Со новата опрема на Клиниката засилена е безбедноста на пациентите, особено ако се земе предвид дека клиниката располага со четири  реновирани операциони  сали.

“Реконструкцијата не е само естетска. Најзначајниот напредок го направивме преку набавка на современа медицинска опрема, како што е оперативниот микроскоп Тивато 700, врвна технологија која овозможува нови димензии во микроскопската хирургија. Овој модел користи прецизна 3Д визуелизација, овозможува хирурзите да гледаат преку високо резолутивен екран, што значително го намалува нивниот замор и ја зголемува прецизноста”, рече Игор Камшикоски- Директор на клиника за уво нос и грло.

Реконструкцијата на здравствените установи нема да запре тука.. Се предвидува завршување на болниците во Штип, Тетово и Кичево, изградба на нова зграда за Медицинскиот факултет и студентски дом.

Мила Тодорова