Од вчерашното гласање на СДСМ во Собранието, каде не ја поддржаа интерпелацијата за главниот обвинител Љупчо Коцевски, се е јасно. СДСМ го штити Коцевски, а Коцевски за возврат го штити СДСМ и нивните кадри потонати до гуша во криминал за да не одговараат, истакна на денешната прес-конференција пратеникот на ВМРО-ДПМНЕ, Бране Петрушевски.
Посочи дека негласањето на СДСМ за интерпелација на главниот обвинител Љупчо Коцевски е одговор на прашањето, зошто никој од СДСМ не е во затвор, а има низа постапки.
-Сега е јасно и кој ја мати водата за Кочани. Истите тие кои претпладне правеа пресови за Кочани, сега сметаат дека Коцевски добро ја работел работата. Очигледно е кој свири, а кој игра во обвинителството. СДСМ силно удира на тапани, а Коцевски игра како ќе му кажат. Заради овој однос на СДСМ и начинот на кој ја киднапирале цела судска власт довербата во правосудството е помало од 2%. СДС гледа на нивниот обвинител Љупчо Коцевски како на последно упориште. Во тоа им се приклучува и ДУИ, кои заедно со Коцевски бараат спас за криминалот на Филипче, Заев и Али. Тоа е всушност и пораката од СДСМ до Коцевски, или е со штитот или на него, кој во периодот кој доаѓа ќе треба да извршува се повеќе насоки, истакна Петрушевски.
Тој го повика Коцевски, како што рече, да покаже грам доблест и да не чека ниту час, туку веднаш да ја прими пораката на Собранието, и волјата на народот преку гласањето во Собранието и да си поднесе оставка.
Секое понатамошно седење на функцијата спонзорирано од СДСМ и ДУИ ќе му го руши и онака слабиот углед и целосно ќе го стави во функција на измеќар и метлар на мафијата.
