Заменик-министерот за економија и труд, Марјан Ристески денеска ги посети општините Берово и Пехчево каде оствари повеќе средби.
Во Берово заменик-министерот Ристески ја посети Канцеларијата на Агенцијата за вработување и оствари средба со вработените, на која дискутираа за нивната работа и активности. На средбата вработените посочија дека има интерес за мерките од Оперативниот план за 2025 година, каде досега завршија јавните повици за мерките самовработување (претприемништво) и Вработување и раст на правни субјекти.
Во рамки на посетата на Берово, Ристески оствари средба и со стопанственици од регионот, каде разговараа за дел од мерките од оперативниот план наменети за развој на стопанството, како и мерките од Програмите за работа на министерството за економија и труд. Во моментов активни се два јавни повици од министерството за економија и труд, во рамки на Програмата за поддршка на конкурентноста на преработувачката индустрија и општествена одговорност.
Првиот јавен повик е за поддршка на лаборатории со кој се предвидува надоместување на дел од трошоците за акредитирање на лаборатории или проширување на опсегот за акредитирање на постоечките лаборатории, како и за набавка на нова опрема за пуштање во промет на квалитетни и безбедни производи.
Вториот е Јавниот повик за поддршка за развивање, одржување и применување социјално прифатливи практики на деловните субјекти, каде е предвидена финансиска поддршка до 200.000 денари за деловни субјекти кои се стекнале со сертификат, се ресертифицирале или поднеле извештај за менаџмент системи за општествена одговорност во текот на 2024 и 2025 година според високи меѓународно признаени стандарди.
Во Пехчево, заменик-министерот Ристески, директорката на Агенцијата за поддршка на претприемништвото, Даниела Димовска и заменик-директорката на Агенцијата за вработување, Весна Пешова остварија работна средба со градоначалникот на Пехчево, Александар Китански.
На средбата се дискутираше за соработката на институциите од централната власт со локалната самоуправа, како и за капиталните проекти кои ќе се реализираат во општината со средства од централната власт. Во Пехчево ќе се реализираат два капитални инфраструктурни проекти, и тоа проектот за реконструкција и рехабилитација на локален пат с. Робово до с. Умлена, како и проектот за изградба на водоводен цевковод во туристичката населба Равна Река.
