До 21:00 часот на територија на цела држава регистрирани се вкупно 29 пожари на отворен простор, од кои пет се активни, шест се под контрола, а 18 се изгаснати, соопшти Центарот за управување со кризи (ЦУК).
Активни пожари има на територија на општините Василево, Радовиш и Берово – село Нивичино, на планината Мал Готен и Малешевски Планини, каде гори нискостеблеста шума, смрека, грмушки и ниска вегетација, во општина Македонски Брод, кај селото Грешница, каде е зафатена мешана шума и сува трева, меѓу селата Локвица и Крапа (деградирана дабова шума) и кај село Латово, место викано Маркова Стапалка, во општина Прилеп – село Штавица, со ширење кон селата Чумово, Волково и Прилепец (ниска вегетација и деградирана шума).
Под контрола се пожарите во општина Ресен, кај селата Шурленци и Езерани (трска и ниска вегетација), во општина Желино – меѓу селата Церово и Групчин (нискостеблеста и деградирана шума), во село Николиќ во општина Дојран, во општина Велес – меѓу селата Џидимирци, Крушје и Иванковци, општина Гостивар – село Симница и во општина Прилеп – меѓу селата Царевиќ и Смолани, место викано Радобилски Рид.
Изгаснати се пожарите во општините Студеничани, Шуто Оризари, Прилеп, Долнени, Струмица, Гевгелија, Кичево, Велес, Свети Николе, Куманово, Старо Нагоричане, Брвеница и Гостивар.
