За првпат во Македонија Кривичниот суд донесе историска пресуда – казна затвор за убиство на животно. Љубе Крстевски доби три месеци ефективна казна затвор, а второобвинетиот Бранко Билбиловски парична казна од 1.000 евра за убиството на кучето Феликс.
Инцидентот се случи на 19 ноември 2024 година. Љубе Крстевски, со стап, крвнички го удирал кучето по глава, нанесувајќи му потрес на мозокот и хематоми. Потоа заедно со Билбиловски, го врзале Феликс со жица и го влечеле до контејнер, каде што го фрлиле, верувајќи дека е мртво. Кучето беше најдено од активисти и однесено на лекување во „Лајка“, каде по сите напори не успеаја да го спасат.
Случајот предизвика бура реакции во јавноста, но и протести. Здруженијата за заштита на животните ја поздравија пресудата како значаен чекор напред, но нагласија дека ова треба да биде само почеток на построга борба против насилството врз животните.
