По два и пол месеци заврши истрагата за пожарот во дискотеката “Пулс” во Кочани. За Тешки дела против општата сигурност, осомничени се вкупно 46-мина. Од денеска па во наредните 15дена одбраната ќе може да изврши увид во доказите, како и да предложи свои докази, по што ќе биде донесена јавнообвинителска одлука. По наредба на јавните обвинители од местото на несреќата, но и од повеќе локации, прибрани се матрејални докази и документација кои биле предмет на вештачење.
„Обезбедени се детални обдукциски вештачења за причината за смрт на секој од починатите, како и за видот и катрактерот на повредите кај повредените лица. Изготвени се градежно и хемиско вештачење, со кои се испитаа околностите во самиот објект, безбедносните стандарди, како и начинот на настанување и ширење на пожарот. Во однос на определен дел од документацијата за клубот се вршеше и графолошко вештачење„ соопштуват од Основновното јавно обвинителство.
13 обвинители од Штип, Скопје и Куманово, беа вклучени во истражната постапка. Извршени се распити на околу 400 сведоци и оштетени, а испитани се и осомничените. По насока на Обвинителството, проверка на работата на клубот вршеше и Управата за финансиска полиција.
„Од бројни електронски уреди, компјутери и мобилни телефони се вршеше извлекување и анализа на податоци, кои се вкрстуваа со останатите информации добиени во текот на истрагата. Во однос на работата и функционирањето на клубот, проверки по насока на јавен обвинител вршеше и Управата за финансиска полиција„ посочуваат од Обвинителството.
До овој момент спроведена е истрага против 14 полициски службеници. Сите докази ќе бидат доставени на Основното јавно обвинителство за гонење на организиран криминал и корупција. Од Обвинителството додаваат дека овој дел од истрагата ќе продолжи и во следниот период со цел целосно испитување на сите факти и околности.
Јавнообвинителската одлука за секој осомничен поединечно ќе биде донесена, врз основа на целокупниот доказен матрејал. Од Обвинителството посочуваат дека доколку од доказите се утврдат елементи на кривично дело и кај други, кои до овој момент не се опфатени со истражната постапка, обвинителството ќе постапува согласно своите надлежности.
Според истрагата, најголем дел од починатите загинале од загушување, но имало и смртни последици од насилен притисок, стампедо. Во пожарот во дискотеката „Пулс” што се случи на 16март, загинаа 62, а над 200 беа повредени.
