Над две илјади невработени ќе се стекнат со нови вештини, знаења за дефицитарни професии, ќе се доедуцираат, ќе учат странски јазици и компјутерски програми преку обуките на Агенцијата за вработување. Од Владата велат дека ова е шанса за сите млади до 29 години кои чекаат на своето прво вработување, на жените кои со години се оставени надвор од пазарот на труд и долгорочно невработени да се обучат за да работат и да бидат платени за тоа. Токму овие три категории ќе имаат приоритет при селекцијата. 245 невработени ќе проследат тримесечна обука кај конкретен работодавач, на конкретно работно место з ашто ќе добијат надомест од 12 илјади денари месечно. Исто толку ќе добијат и 600 луѓе за обуки за веќе побарувани занимања во делот на социјалните услуги, зелени работни места и трговија. Особено интересни се обуките за напредни ИТ програми кои ќе бидат бесплатни, кои инаку би биле прескапи за невработените.
„Јас лично би сакала да ги истакнам обуките коишто се однесуваат на напредни дигитални и ИТ обуки, коишто се преку лиценцирани програми. Ќе можете од документот да видите за кои обуки, колку актуелни обуки коишто се навистина побарувани во овој период од страна на многу млади, на многу граѓани се вклучени во оваа мерка, колку се навистина истите овие и финансиски оптеретувања за младите. Сега ќе можат да бидат опфатени и да ги искористат 470 лица, а секој учесник ќе добие меѓународно признат сертификат, што значително ќе ја зголеми неговата или нејзината конкурентност на пазарот на труд“ – вели портпаролката на Влада, Марија Митева.
Во Оперативниот план на Агенцијата за вработување годинава се издвоени рекордни 40 милиони евра за девет мерки за ангажирање на над 16 илјади луѓе. Планот предвидува 10 илјади евра неповратни средства за отворање бизнис за младите до 29 години и 7 илјади евра за оние над 29. Постои опција и за здружување во друштва со ограничена одговорност за да се добие поголема финансиска поддршка. Од Владата очекуваат целосна искористеност на мерките и на предвидените пари. Предвидено е 65% од новите вработувања да бидат млади до 29 години. Преку отворање на десетици илјади нови работни места преку мерките за вработување и инвестициите во инфраструктура и нови капацитети, Владата очекува невработеноста да се намали од сегашните 11,9% на 9 отсто до крајот на годинава.
