Со превентивни мерки надлежните се подготвуваат да одговорат на пожарите што би можеле да ја зафатат државата. На терен веќе се преземаат чекори за да не се повтори ланското сценарио, кога огнената стихија пеплоса илјадници хектари шума. Вработени во Национални шуми, почнаа да ја чистат шумската инфраструктура, а со механизација се прават обрачи, посебно околу зелените појаси кои би можеле да бидат лесна мета на пироманите. Правењето на заштитни обрачи, лани се покажа како добра пракса, кога од целосно опожарување спасија неколку села лоцирани во подножјето на планината Серта.
„Во моментот активно работиме на прочистување на патиштата коишто ги имаме, на шумската патна инфраструктура, отварање на нови патишта и средување на веќе постоечките. Тоа значи правење на заштитни обрачи за заштита од евентуални пожари„ изјави Кире Михаилов, заменик генерален директор на ЈП„ Национални шуми„.
Во меѓувреме, владини работни групи се фокусираат на изготвување на Национална стратегија за заштита од пожари. Претходно направената анализа укажува дека ниту една институција во државата соодветно не е подготвена да се бори со пламените јазици, објаснува Михилов.
„Стратегијата вклучува набавка на она што никаде го нема. Значи ниту една институција не е подготвена за заштита од пожарите, вклучително почнувам од нас и сите други останати. Секаде се со дотраени возила, секаде се со опрема која малтене е неисправна и она што го кажав на почетокот, ги начекавме нашите вработени да гасат пожари буквално на влечки, во вистинска смисла на зборот. Ги начекавме со неподмирено здравство беа луѓето„ изјави Кире Михаилов, заменик директор на ЈП„Национални шуми„
Според податоците на Европскиот информациски систем за шумски пожари, програма Коперник , лани во Македонија изгорела над 94.000хектари, што е речиси колку претходните десет години заедно. Како една од потешките години се посочува и 2019 година, кога изгореле 29.807 хектари.
