Иселениците од дијаспората можат да придонесат за поголем економски раст на земјава. Македонците од странство се повеќе се заинтересирани да инвестираат во родната земја. Засега нивната улога главно е ограничена на праќање пари од други земји, со што го зголемуваат доходот на населението. Сепак, оние кои веќе вложиле во државава велат дека најголемите причини треба да се бараат во емоционалната поврзаност со Македонија, но и можноста да бидат поблиску до своите семејства.
Иселениците бараат земјава да ги подобри врските со Македонците во другите држави, ако сака повеќе инвестиции од нив. Ја поздравуваат одлуката Министерството за надворешни работи и надворешна трговија да работи повеќе на економската промоција на Македонија, затоа што досега дијаспората немала многу контакти со македонски компании. Исто така, бараат поголема дигитализација на процесите во администрацијата, за што побрзо надминување на административните пречки за отворање на компании и работа во Македонија.
Од година в година се зголемува сумата што иселениците ја праќаат од странство. Ако до пред 15 години, овие дознаки од странство изнесуваа една милијарда евра, сега надминуваат 1,5 милијарди евра, што е околу 15% од БДП во просек. Притоа Македонците кои живеат и работат во други држави најголем дел од парите префрлаат во готовина, пракса која треба да се надмине со членството на земјава во СЕПА, со што треба да се олеснат прекуграничните плаќања..
