Финансиската стабилност и економските реформи на земјава ќе бидат во фокусот на меѓународните активности на министерката за финансии, Гордана Димитриеска-Кочоска, која од 20 до 26 април престојува во работна посета на Соединетите Американски Држави.
Посетата започнува со активности во Чикаго, каде што министерката ќе се сретне со претставници на македонската дијаспора на покана на локалните македонски здруженија. Средбите се насочени кон унапредување на односите со иселеничките заедници и разгледување на можности за нивно поголемо вклучување во економскиот развој на Македонија.
Во вториот дел од посетата, Димитриеска-Кочоска ќе патува во Вашингтон каде од 22 април ќе учествува на Пролетните средби на Меѓународниот монетарен фонд и Светската банка – настан што ги собира креаторите на глобалната економска и финансиска политика. За време на состаноците, министерката ќе оствари средби со високи претставници од ММФ, Светската банка, Министерството за финансии на САД (Трезорот), како и со претставници на други меѓународни финансиски институции.
На агендата се вклучени теми поврзани со макроекономската стабилност, буџетската дисциплина, подобрување на управувањето со јавните финансии и создавање услови за одржлив економски раст.
Посетата претставува можност за претставување на напорите на Владата за спроведување на економски реформи и за зацврстување на соработката со меѓународните партнери, како и за потенцијално обезбедување на дополнителна техничка и финансиска поддршка.
