Уапсен е директорот на болницата за геријатрија, доктор Мухсин Арифи, под сомнение дека барал 20 илјади евра мито за да смести болен и неподвижен човек.
„Девастираниот систем мора да го вратиме и ќе го вратиме во функција. За жал, кога сè уште владее национална тага, некои поединци се осмелуваат нелегално да профитираат. Во координирана акција со Основното јавно обвинителство за гонење на организиран криминал и корупција, приведени се две лица, меѓу кои и директор на здравствена установа, поради сомнение за примање поткуп во износ од 20.000 евра. Директорот, заедно со посредник, барале и примиле поткуп за сместување болно и неподвижно лице во геријатриска установа“, вели директорот на Бирото за јавна безбедност при МВР, Александар Јанев.
Претходно од обвинителството информираа дека во координирана акција со полицијата приведени се две лица под сомнение за кривични дела примање поткуп и примање награда за противзаконито влијание.
Во оваа здравствена установа се примаат возрасни пациенти во најтешка здравствена состојба, листите на чекање се големи, а бројот на кревети ограничен.
