Во молк, скршени од болка огромен број граѓани денеска тивко маршираа низ центарот во Кочани. Со фотографии во рацете од своите чеда, семејствата на загинатите од паркот на револуцијата во Кочани, го почнаа „Маршот на ангелите“. Тивко, без да изустат ниту збор, реката граѓани полека се движеше по улиците. Се слушаше само плач кој ожалостените мајки, кои храбро сакаа да го задржат длабоко во себе…
„Кој го уби мојот ангел? Кој го уби мојот херој? И кој го пеплоса тоа ангелско лице? Не само нејзиното, туку и на сите други деца!„ праша една мајка.
„Маршот на ангелите„ почна во 12.05 минути, како симбол на задоцнетата институционална реакција. Поворката помина и покрај кафулето на сопственикот на дискотеката. Таму застанаа и молчеа во чест на загинатите.
Со транспаренти на кои пишуваше „ Ова не е несреќа, ова е убиство„, „Коруптивниот систем, ги уби нашите деца „поворката, тивко се упати кон општинската зграда, а оттаму кон Полициската станица, Основниот суд и Обвинителството.
„На мене ми загина внука, на син ми , ќерка. Имаше 17години, ништо не виде од животот. Нема друго што да кажам. Никогаш вакво нешто да не се случи. Ги испративме да се веселат, а они отидоа во смрт. Да одговараат сите!„ порачаа граѓаните кои денеска мирно протестираа во Кочани.
Граѓаните кои денеска тивко маршираа, порачаа доколку сите институции си ги извршувале своите задачи до трагедијата немало ни да дојде. Во писмено соопштение, организаторите на „Маршот на ангелите„ потенцираа дека денешниот марш со кои бараат правда за најмилите, не е за лицата од обезбедувањето.
