Со пари од унгарскиот кредит, Штип ќе ја враќа убавината на тврдината Исар. Со проектот кој ќе биде финансиран со средства преку вториот јавен повик се предвидува целосна реконструкција на акрополот, со што белегот на градот-калето ќе го добие својот автентичен лик од раниот среден век кога се градело за одбранбени и стратегиски потреби на градот.
„Децински сон на штипјани,коишто досега си замислувале како некогаш изгледала тврдината Исар синонимот и симболот на градот Штип, конечно проектот којшто го добивме од страна на Музеј-Штип, успеавме да обезбедиме финансирање преку Владата на Република Македонија, нешто повеќе од 1,6 милиони евра се средства предвидени за изградбата на тврдината Исар“ изјави Иван Јорданов, градоначалникот на Штип.
Со реализација на проектот ќе се започне веднаш по завршувањето на тендерската постапка, а согласно планот, голем дел од градежните активности треба да завршат оваа година.
„Проектот вклучува три кули коишто се поврзани со ѕидини, повисоки од 4 метри, на коишто ѕидини сите посетители ќе имат можност да се движат и да имат прекрасен поглед на градот Штип“ изјави Иван Јорданов, градоначалник на Штип
Тврдината Исар во себе крие многу тајни, но и легенди кои во минатото дел од нив ја потврдија својата веродостојност. Таков е примерот и со легендата за тајниот триесетметров тунел кој води до врвот на тврдината, како и обичајот Чет^рсе кој поради својата уникатност се најде на листата на нематрејално богатство на Унеско.
