Изградбата на новата Клиничка болница во Штип, ќе донесе и подобри услови за студирање на идните лекари. Имено, во рамки на објектот ќе се гради уште една зграда каде ќе се биде сместен Факултетот за медицински науки. Универзитетот има маркица за градба, а во моментот основниот проект за новиот факултето е предаден на Проектната група при Министерството за здравство, задолжена за изградба на новата Клиничка болница.
„Тие се предадени на проектната единица, која е во рамки на Министерството за здравство. Ние неколкупати разговаравме со нив, им ги дадовме документите што ги имаме. Јас се надевам дека тој процес ќе биде брз и градот ќе добие нова болница, а студентите ќе добијат нов и современ објект каде ќе може да го јакнат своето студирање“, изјави професор Дејан Мираковски-ректор на УГД-Штип
Според проектот од 2014, кој најверојатно ќе треба да претпрпе измени, факултетот ќе се простира на околу 6000метри квадратни. Освен амфитеатар, предавални, во него ќе бидат сместени и неколку институти кои ќе имат научно-образовна компонента. Од изградбата на новиот објект бенефит ќе имат и медицинскиот персонал во болницата, но и граѓаните.
„6000метри квадратни ќе биде целиот објект и ќе вклучува повеќе институти коишто освен што ќе има научно-истражувачка и образовна димензија, ќе бидат комплементарни со функционирањето на болницата, односно ќе дават јавно-здравствени услуги заедно со болницата„ изјави проф. Дејан Мираковски-ректор на УГД-Штип.
Студиските програми на Факултетот за медицински науки, се помеѓу најатрактивните на штипскиот Универзитет и овде студираат најголем број на студенти, кои за да ги следат предавањата се приморани да се движат од еден до друг кампус кои меѓусебе се одалечени. Освен домашните, најмногу застапени се и студентите од Турција, но и од други држави, а програмата по општа медицина може да се следи и на англиски јазик.
Александра Ристевска
