По цели 60 години, граѓаните на Бутел 2 ќе добијат нова градинка. Родителите ќе можат да пратат над 200 дечиња во предшколската установа, кадешто ќе добијат пристојни услови за престој, грижа, ран развој и подготoвка за на училиште. Инвестицијата е вредна 1,6 милиони евра.
Минатата седмица беше ставен и камен темелник за ново училиште во Драчево. Министерот за социјална политика, демографија и млади Фатмир Лимани уверува дека грижата и едукацијата на децата ќе бидат главен приоритет на оваа Влада.
Премиерот Мицкоски ветува дека Владата интензивно ќе работи за да се најдат решенија за проблемите на граѓаните. Оваа година за прв пат општините ќе можат да конкурираат за пари од буџетот со проекти вредни 250 милиони евра. Тој ги охрабри градоначалниците да аплицираат за изградба на капитални објекти како училишта, градинки, инфраструктура. Вели дека не сака да зборува за ветувања, туку за нивна реализација.
Парите за општините ќе бидат префрлени од централниот буџет. До крајот на месецов ќе има ребаланс и ќе се знае од каде ќе се скрати за да им се помогне финансиски на локалните власти. Летово општините ќе ги довршуваат проектните документации за проектите, а веќе во септември ќе можат да аплицираат на јавниот повик на Министерството за локална самоуправа.
