Граѓаните што имаат платежни сметки во Алта банка АД Битола, а немаат платежни картички, од денеска ќе може да ги подигнуваат своите средства на шалтерите во главната филијала на банката во Битола.
За таа цел, ќе бидат отворени повеќе шалтери на адресата ул. „Добривое Радосављевиќ“ бр. 21, наменети за исплата на готовина, особено за пензионерите и примателите на социјална помош, кои средствата ги добиваат преку сметки во банката, информира Народната банка.
Граѓаните ќе може да подигнат најмногу 20.000 денари, колку што изнесува максималниот дозволен износ за повлекување во период од две недели.
Од 6 ноември, вклучително и в сабота, 7 ноември, филијалата ќе работи во две смени, со цел да се опслужат што поголем број клиенти.
Исплатата ќе се врши во текот на повеќе денови, според однапред утврден распоред. Граѓаните ќе добијат СМС-порака со информација за денот и часот кога треба да дојдат во филијалата.
Народната банка апелира граѓаните да се придржуваат до добиените термини и да не доаѓаат во филијалата пред определеното време или во деновите кога не се повикани за да се избегнат метеж и подолго чекање. За оние што нема да може да дојдат во закажаниот термин, ќе бидат обезбедени дополнителни термини.
Шалтерите ќе бидат наменети исклучиво за подигање готовина и нема да се вршат други видови трансакции.
Во тек се и подготовките за отворање шалтери за пензионерите и примателите на социјална помош во други градови во земјата за што Народната банка дополнително ќе информира.
