Политички шпекулации за бегство во Москва, авион вратен среде лет, безбедносни проверки и полиција на белградскиот аеродром ја одбележаа ноќта во Србија.
Во центарот на случувањата се најде поранешниот директор на Безбедносно-информативната агенција (БИА), Александар Вулин.
Имено, синоќа авионот на „Ер Србија“, кој полетал од Белград кон Москва, по извесно време добил наредба веднаш да се врати. Според неофицијални информации, причина за враќањето било сомневањето дека Вулин се качил во авионот без да ја помине задолжителната безбедносна проверка.
Беше објавено дека директорот за корпоративна безбедност на аеродромот „Никола Тесла“, Милан Куч, по прегледувањето на снимките од надзорните камери утврдил дека не биле почитувани процедурите и побарал авионот да се врати.
„Ер Србија“ потврди дека авионот бил вратен по добиена информација од надлежните аеродромски служби за потребата од дополнителни безбедносни проверки поврзани со еден патник. Компанијата не го именуваше патникот.
По слетувањето се огласи и Вулин, кој потврди дека бил во авионот, но категорично ги отфрли информациите дека ги избегнал безбедносните проверки.
