Политичкиот говор на омраза се злоупотребува за блокади при евроинтеграциите на Македонија, вели академик Катица Ќулавкова и нагласува дека е парадокласно и според неа би било „непоправлива политичка и историска грешка“ во ситуација кога и во некои сериозни европски држави, вклучително и во Централна Европа, се отвораат прашања за иднината на Унијата, Македонија да бара членство по цена на откажување од сопствениот историски, национален и културен континуитет.
Македонија според Ќулавкова во никој случај не треба да подлегнува, не од националистички некакви побуди, туку од принципиелни политички позиции, засновани врз меѓународното право и општоприфатените меѓународни конвенции затоа што мора има институционален реципроцитет.
– Ако дојде до внесување во Уставот, без да се внесат Македонците во бугарскиот Устав, тогаш ние веќе немаме она што некои наши политичари велат „да бидеме сигурни и имаме гаранција дека повеќе нема да има никакви барања“. Не треба да имаме повеќе никакви барања, доволно е ако ние ова го направиме, ние да признаеме стотици граѓани од бугарско потекло поименично во Уставот како конститутивен фактор на државата, а тие нема да нè признаат, ниту обични здруженија на македонската популација во Бугарија, мислам дека ќе дојде до една крајна диспропорција и мислам дека во тој случај говорот на омраза, диплотамски и дискретен, нема да биде само брутализиран со вулгарни искази на социјалните мрежи, туку ќе биде еден чин на брутално однесување кон државата Македонија – изјави Ќулавкова во изјава за медиумите пред почетокот на научниот собир „Негирањето на политичката легитимност на македонската нација и посебноста на македонскиот јазик како форма на политички говор на омраза“, во организација на Институтот за социолошки и политичко-правни истражувања при УКИМ и Истражувачкиот центар за ареална лингвистика „Божидар Видоески“ при МАНУ.
Ќулавкова исто така нагласува дека со преспанскиот договор прифативме дефиниција што, според нејзино толкување, го стеснува и редуцира македонскиот идентитет и неговиот историски континуитет.
– Се откажавме од континуитетот од пред таканареченото доаѓање на Словените за кое нема никакви докази. Значи, прифативме дека имаме историја само од 9 век од нашата ера. Сега, со самото прифаќање на протоколите, ние како да се доближивме до другата екстремна позиција кога редуцираме голем дел од својата културна и словенска историја и прифаќаме дека сме само признати како конструкт по војната како еден вид конвенционална, како да кажам, група, измислена нација, која нужно не мора да ги содржи атрибутите македонскиот народ и македонскиот јазик – изјави Ќулавкова.
Затоа, нагласува Ќулавкова, Македонија не смее да го продолжи овој процес и треба да отстапи од погрешно потпишаните протоколи.
– Како тоа ќе го направи државата, тоа е веќе прашање на државните органи – изјави Ќулавкова посочувајќи дека униите се краткотрајни и може да се укинат, но нацијата постои илјадници години.
Според Ќулавкова, не смееме да се откажеме од сопствените интереси, кои се многу поголеми и позначајни од моментата политичка цел за членство во Европската Унија.
