Енергетиката денес е многу повеќе од прашање на производство и потрошувачка на енергија, таа е прашање на економска конкурентност, технолошки развој, заштита на животната средина и квалитет на животот на граѓаните – порача министерката за енергетика, рударство и минерални суровини Сања Божиновска на свеченото отворање на 14-тото издание на Студентската конференција за енергетска ефикасност и одржлив развој (СКЕЕОР), во организација на Здружението за истражување и промовирање енергетска ефикасност и одржлив развој.
Осврнувајќи се на улогата на младите генерации, Божиновска истакна дека студентите се идните истражувачи и инженери и тие не се само пасивни набљудувачи, туку носители на нови перспективи и иновативни решенија за актуелните предизвици.
– Начинот на кој ги користиме енергијата и природните ресурси, технологиите во кои инвестираме и знаењето, ќе имаат директно влијание врз нашата иднина. Во оваа трансформација, токму вие, младите луѓе, имате посебна улога. Вие не сте само идни инженери, истражувачи и носители на одлуки. Вие сте генерацијата што веќе денес може да понуди нови перспективи, поинакви пристапи и иновативни решенија за предизвиците со кои се соочуваме – изјави Божиновска.
Како значаен чекор во оваа насока, Божиновска го поздрави воведувањето промотивни признанија за најдобрите студентски трудови, со цел да се поттикне спојувањето на академското знаење со практичната реализација во институциите и компаниите.
– Ова е важен чекор во создавање култура во која знаењето, истражувачката работа и иновативноста не остануваат незабележани, туку добиваат соодветно признание и поттик за понатамошниот развој. Ова признание не е само награда за постигнатиот труд. Тоа е порака дека вашите идеи се важни, вашата работа привлекува внимание и општеството има потреба од нивната љубопитност, од вашата љубопитност, посветеност и храброст – изјави Божиновска.
Особено важно, според Божиновска, е да создадеме повеќе можности најдобрите студентски истражувања да излезат од академските рамки и да стигнат до институциите, компаниите и сите што може да помогнат во практичната реализација.
– Имате знаење, компетенции и сте спремни да ги претворите плановите во конкретни резултати. Ве охрабрувам да продолжите да истражувате, да барате решенија, кои ќе ги надминат досегашните ограничувања. Вашите идеи може да помогнат енергијата да ја користиме поефикасно, обновливите извори да ги интегрираме подобро и индустријата да стане поконкурентна – изјави Божиновска.
Деканот на Факултет за електротехника и информациски технологии (ФЕИТ), Владимир Атанасовски, на отворањето порача дека 14 изданија се значаен континуитет за една студентска иницијатива и покажуваат дека постои потреба младите да добијат простор да истражуваат, да поставуваат прашања и активно да учествуваат во разговорот за предизвиците што нè очекуваат.
– Тие се потврда дека ваквите иницијативи може да ја поврзат академската заедница со поширокото општество и да создадат средина во која знаењето не останува ограничено на училниците и лабораториите, туку добива конкретна примена и општествена вредност – изјави Атанасовски.
Поврзувањето на универзитетите, институциите и стопанството, според деканот на ФЕИТ, претставува неопходен услов за знаењето да создаде вистинска и долгорочна вредност.
– И токму во таа поврзаност ја гледам и силата на СКЕЕОР. Преку вакви конференции студентските истражувања добиваат поширока видливост, академските идеи се соочуваат со практични прашања, а младите истражувачи добиваат можност да разговараат со луѓе што имаат разни знаења, искуства и перспективи. Од ваквите средби произлегуваат нови прашања, нови партнерства и понекогаш први чекори кон решенија што може да имаат конкретна примена – изјави Атанасовски.
Според Атанасовски, истражувањето не почнува со првото работно место ниту, пак, иновацијата е резервирана за големите лаборатории и развојните центри, тука таа често почнува со едно добро поставено прашање, со желба да се разбере некој проблем и со подготвеност да се бараат решенија надвор од веќе познатите рамки.
Проректорката за наука при УКИМ, Ивана Јанеска-Стаменковска, во своето обраќање нагласи дека во време на забрзана енергетска транзиција, климатски промени и дигитализација иновативните решенија се клучни за градење одржлива и просперитетна иднина.
- СКЕЕОР, која почна како студентска иницијатива во 2013 година, прерасна во препознаена платформа со над 1.500 учесници и над 300 презентирани студентски трудови досега. Изминатите години конференцијата прерасна во значаен академски настан, кој систематски ги поврзува студентите со академската заедница и претставува мост помеѓу младите истражувачи и искусните професионалци – изјави Јанеска-Стаменковска.
Јанеска-Стаменковска исто така истакна дека УКИМ останува целосно посветен на зајакнување на научноистражувачките капацитети, интернационализацијата и создавањето услови за младите кадри активно да придонесуваат кон технолошките и еколошките трансформации.
Претседателот на Факултетското студентско собрание на ФЕИТ, Мартин Тодоровски, на сите учесници им честита на покажаната храброст да излезат од својата комфор-зона и на 20 години, со многу труд, да презентираат знаења и идеи пред академијата.
– Честитки за покажаната храброст. Ова е храброста токму онаму каде што се градите најпрвин како луѓе, а потоа како врвни инженери – порача Тодоровски.
Претседателот на организацискиот одбор на СКЕЕОР, Петар Димов, изрази задоволство што веќе 14 години СКЕЕОР создава простор во кој студентите имаат можност да ја материјализираат својата иновативност и да направат разлика.
– Во време кога енергетските предизвици се сè поизразени, од клучно значење е ние како студенти не само да го следиме напредокот туку да бидеме лидери во соочувањето со проблемите и да нудиме конкретни решенија. Токму тоа е суштината на СКЕЕОР – да ги поттикне младите да размислуваат и истражуваат – порача Димов.
Во рамките на повеќедневната конференција студентите ќе ги презентираат своите истражувачки трудови од областите на обновливите извори на енергија, телекомуникациите, автоматиката и електронските системи.
На свеченото отворање присуствуваа претставници од Министерството за енергетика, рударство и минерални суровини, деканатот на ФЕИТ, Инженерската институција на Македонија, како и голем број професори, асистенти и студенти од техничките факултети.
