Илјадници гости од земјава и странство викендов се во Штип. Традиционалниот вкус на гастрономскиот специјалитет пастрмаилија го наполни градот. Фурните работат без престан, а мирис на тазе испечено месо и тесто се шири низ градот. Повеќе од дваесетина угостители поставени на шеталиштето „Ванчо Прќе“ ги угостуваат гостите.
„Многу е убаво. Во градот се чувствува позитивна атмосфера, раздвиженост. Преполно е со луѓе. Манифестацијата ни го раздвижи градот и треба оваа манифестација да продолжи да живее“, велат анкетираните посетители.
Успешноста на Пастрмајлијадата не се мери само по изедените пастрмаилии на поставените штандови. Сите сместувачки капацитети се исполнети. Полни се кафулињата, рестораните, а дел од гостите го напуштаат градот и со купено парче облека, земајќи го предвид фактот дека градот е препознатлив и по модната индустрија.
„Настанот има повеќекратно значење, најпрвин промоција на кулинарскиот специјалитет, промоција на култура, но исто така има и економско локално значење за нашиот град, затоа што сите сместувачки капацитети се исполнети, а угостителските објекти верувам дека ќе бидат преполни“, изјави Иван Јорданов, градоначалник на Штип.
Пастрмајлијадата има унифицирана цена, 250 денари, а според првичните анализи, само вчера се изедени околу 10.000 пастрмаилии. Манифестацијата започна вчера со сечење на џиновската пастрмаилија, а вечерва на сцената на Градскиот стадион ќе настапи балканската ѕвезда Жељко Јоксимовиќ.
