Над 64 милиони евра од државната каса се слеале во работни спорови за само пет години. Речиси половина од сумата не отишла за главниот долг, туку за камати, судски и извршни трошоци. Државниот завод за ревизија алармира – системот за спречување и управување со работните спорови е неефикасен, а бројот на предмети забрзано расте.
- „Ревизијата утврди дека државата нема воспоставено ефикасен и системски пристап за управување со работните спорови, што се одразува со континуиран раст на бројот на предмети во работа и финансиски импликации врз Буџетот на државата..“се наведува во извештајот на ДЗР.
Проблемот не е само во исплатените средства. Расте и бројот на судските предмети. Во 2021 година биле активниоколу 9.300 предмет, а во 2025 година бројката достигнала над 24 илјади– повеќе од два и пол пати за само четири години.
Според ревизорот, загрижува и податокот дека дури 95 проценти од средствата биле наплатени присилно, преку налози за извршување.
Ревизорите забележуваат и дека во институциите ретко се користат алтернативни механизми за решавање на конфликтите, додека Државното правобранителство главно реагира откако спорот веќе ќе стигне пред суд.
- „Отсуствуваат анализи за причините поради кои вработените ги тужат институциите, со цел да се иницираат соодветни законски измени.. Дополнително, Државното правобранителство претежно има реактивна улога, насочена кон застапување во судските постапки, без доволно развиена превентивна и советодавна функција“ стои во извештајот.
Дополнителен проблем е и евиденцијата. Начинот на кој се регистрираат и плаќаат обврските не обезбедува доволно податоци со што се отежнува следењето на предметите и навременото управување со финансиските ризици.
ДЗР препорачува воспоставување функционален систем за работните спорови, прецизирање на законската рамка, подобро следење на предметите и зајакнување на превентивните механизми за помалку непотребни трошоци за државниот буџет.
