Пред почетокот на новата учебна година, штипските училишта ги засилуваат мерките за превенција од врсничко насилство. Поголемото присуство на наставниците и стручните служби меѓу учениците е еден од начините навреме да се забележи и спречи насилството.
Дежурствата на наставниците за време на одморите треба да помогнат полесно да се забележат конфликтните однесувања меѓу учениците. Ќе има и повеќе работилници и трибини, на кои учениците ќе се запознаваат со последиците од насилството, но и со тоа низ што поминуваат жртвите.
„Се воведоа дежурства во ходниците за време на одморите, така што учениците постојано се под контрола. Исто така, педагошките служби ја интензивираат својата работа и постојано работат со учениците. Освен на учениците, даваат поддршка и на наставниот кадар, но и на родителите“, изјави Снежана Санева од Секторот за образование при Општина Штип.
Една од најопасните форми е сајбернасилството. Анализите покажуваат дека во последниот период е зголемено за повеќе од 30%. За разлика од физичкото насилство, кое најчесто се случува во одреден момент, жртвата на интернет може да биде изложена на малтретирање во кое било време.
Најчесто на мета се девојчињата, кои се соочуваат со закани, ширење лажни информации, како и злоупотреба на нивните лични податоци.
„Ако е физичко насилство, ќе се видат модринки или нешто што е видливо, но кај сајбернасилството или психичкото, односно емоционалното насилство, има страшни последици по жртвата, а тоа е губење на самодовербата, затворање во себе, станување интровертна личност и неможност да се соочи со средината“, изјави проф. д-р Татјана Стојановска Иванова.
И новиот извештај „Спречување на штета во Македонија“, изработен од УНИЦЕФ, ЕКПАТ и Интерпол, во соработка со Владата, покажува загрижувачки податоци.
Во државата, секое десетто дете на возраст од 12 до 17 години било изложено на сексуална експлоатација и злоупотреба преку интернет.
