На 80-годишна возраст почина Доли Партон, една од најголемите ѕвезди во историјата на кантри музиката. Веста ја објави нејзиниот внук Брајан Сивер на Инстаграм, а според нејзиниот претставник, Партон починала мирно во својот дом во Нешвил.
Партон минатата година ги откажа најавените настапи во Лас Вегас поради здравствени проблеми, а подоцна не присуствуваше ниту на доделувањето на Гувернерските награди, каде што требаше да ја прими почесната хуманитарна награда „Џин Хершолт“.
Нејзината кариера траеше повеќе од шест децении. Од скромното детство во Тенеси, Партон се издигна до светска музичка и филмска ѕвезда. Автор е на некои од најпознатите кантри песни, меѓу кои „Jolene“ и „I Will Always Love You“, а светски успех постигна и со „9 to 5“.
Во кариерата продаде повеќе од 100 милиони албуми и освои 11 награди „Греми“, вклучително и признание за животно дело.
Покрај музиката, Партон беше успешна актерка, бизнисменка и филантроп. Нејзината фондација „Доливуд“ и проектот „Библиотека на имагинацијата“ обезбедуваат поддршка и книги за деца ширум светот.
Доли Партон зад себе остави музичко наследство кое со децении ги надминува границите на кантри жанрот.
