Големиот шумски пожар кој вчера избувна во атарот на делчевското село Бигла е локализиран и ставен под контрола. Утринава, по направената опсервација со дрон, биле лоцирани критичните точки, по што на терен веднаш е почнато локално гасење.
Огнот зафатил околу 220 хектари, а екипите остануваат на терен. Вчера Бигла беше на удар на огнената стихија. Повеќе од 300 луѓе, тешка механизација, специјализирани возила, авиони и полициски хеликоптер беа мобилизирани во борбата со пламените јазици, кои се заканија да стигнат до првите куќи во селото.
Во жестоката борба со огнот има и повредени. Мештанинот кој, според првичните информации, го предизвикал пожарот со палење гуми, заедно со уште две лица, меѓу кои и полицаец, во обид да го сопре огнот, завршил на клиники во Скопје.
„Според првичните информации, опожарена е борова и дабова шума од 220 хектари, што е значително голема површина. Ова ми дава за право уште еднаш да упатам апел до сите граѓани во државата, бидејќи една ненамерна грешка може да предизвика големи штети и, не дај Боже, загуба на човечки животи“, изјави градоначалникот на Делчево, Иван Гоцевски.
И во Пехчевско, во близина на границата со Бугарија, кај селото Црник, будно се следи состојбата. Според првичните информации, вчерашниот пожар бил предизвикан од гром, а опожарени се околу хектар и половина борова шума.
„Тежок пожар за којшто не очекував дека ќе биде изгаснат. Благодарение на поддршката на градоначалникот и интервенцијата на трите ер трактори на ДЗС, овој пожар беше ставен под контрола, а потоа и изгаснат. Денеска не дава знаци на горење“, изјави Стојанче Ангелов, директор на ДЗС.
Вчерашниот ден беше пеколен. Биле регистрирани најмалку 33 пожари на отворено, а во моментот во државата има најмалку пет активни жаришта.
Дождот помогнал во гасењето на огнот над селото Сушица, кај Коњаре. Најтешка е состојбата на планината Китка, каде пожарот во неколку наврати бил ставан под контрола. Се верува дека е подметнат.
Цела ноќ траела и битката за селото Палиград, каде екипите се бореле огнената стихија да не се доближи до куќите.
