Се гради пристапниот пат до тврдината Исар, кој ќе се користи за транспорт на градежните матрејали и механизацијата потребни за нејзината обнова. Со изградбата на патот се создаваат услови за почеток на градежните и конзерваторски активности на еден од најзначајните културно-историски локалитети во Штип, чија обнова ќе придонесе за поголема афирмација на градот.
„Ќе ја доловиме автентичноста и преку сето она кое го предвидува проектот, трите видиковци, акрополот, тврдината која треба целосно да биде осветлена ќе го презентира минатото и историјата на градот„ изјави Иван Јорданов, градоначалник на Штип.
Тврдината ќе се реставрира по примерот на скопското Кале и Самоуловата тврдина во Охрид. Ќе бидат обновени трите кули, меѓусебно поврзани со бедем висок 4метри. Просторот ќе биде осветлен, ќе се изгради паркинг и патека до врвот, од каде се протега панорамски поглед кон целиот град. Сегашниот изглед на тврдината датира од 14 век, но на локалитетот се зачувани остатоци од вториот век, со надградба од шестиот век. За обновата, ќе бидат вградени повеќе од 3.500 кубни метри камен.
„Не само овој дел од градот туку и други локации кои се препознстливи за нашиот град размислуваме да ги конзервираме, реставрираме и обновиме и да ги доближиме до сите посетители да се осознаат со историското наследство на нашиот град„ изјави градоначалникот на Штип, Иван Јорданов.
Проектот е на штипскиот Музеј, а Општина Штип, обезбеди околу 1,4 милиони евра преку вториот владин повик за искористување на средства од унгарскиот кредит. Предвидено е работите да завршат во рок од 18месеци.
