Сирење, јајца, мелено месо, сладолед: на овие температури потребен е помалку од еден час да се расипат ако не се чуваат правилно. За да се избегнат труења со храна, надлежните апелираат до граѓаните да купуваат храна од проверени места, да го земат предвид нејзиниот изглед и по пазарењето да не се задржуваат на пат кон дома.
Производите, особено лесно расипливите од животинско потекло, да се чуваат во разладни уреди. Да се избегнува купување на храна која што е со оштетена амбалажа, нагмечена, надуена или напукната. При купувањето да не ја задржуваат, да не ја чуваат храната во загреани автомобили. Да се врши набавка на самата храна во утринските или во доцните вечерни часови“, вели Ѓоко Ѓорчески, раководител на државна инспекција за ветеринарно јавно здравство:
Внимателноста треба да се задржи и по пристигнувањето дома- храната која бара разладување треба што побрзо да се смести во фрижидер, а одредени видови продукти е препорачливо и да се избегнуваат во време на екстремни жештини, сметаат надлежните.
„Потребно е разладената храна да се чува од нула до пет степени. При набавка на овошје и зеленчук, потребно е темелно да се измијат со вода, месото, млекото и јајцата термички добро да се обработат. Да се внимава во овој период на консумација на лесно расипливи сосови, кечапи, мајонези и од сопствено производство, преливи и крем салати“, вели Ѓоко Ѓорчески, раководител на државна инспекција за ветеринарно јавно здравство
Од АХВ велат дека нивните инспектори летово спроведуваат засилени контроли на терен кои опфаќаат ресторани, маркети, продавници, а се води сметка и за условите во кои се чува и подготвува храната во туристичките места, се со цел таа да биде безбедна кога ќе стигне во рацете на потрошувачите.
