Главниот град деновиве дише со поспоро темпо. Продолжениот викенд по повод Илинден, летните одмори и жештините ги оддалечија граѓаните од скопскиот асфалт. Булеварите, центарот на градот и јавните површини се значително потивки од вообичаено, па дури и пусти.Ретки минувачи и поредок сообраќај е сликата што доминира во метрополата.
Полупразни се и паркинзите, а помалку посетители има и во угостителските објекти. Дел од нив деновиве воопшто не работат поради колективни одмори, додека во оние што се отворени, бројот на гости е значително помал.
Имаше луѓе, но не како по обично, затоа што сите се секако по одмори, на сабајле знаат да дојдат тука на утринско кафе, но исто, помалку од обично. -вели вработена во угостителски објект.
Најголем дел од скопјани празничните денови ги искористија за одмор надвор од градот, додека оние кои останаа, според она што може да се види, засолниште од високите температури бараат во климатизирани простории, како што се трговските центри.
Не е потребна статистика за да се забележи дека Скопје денес е значително попразно. Доволно е да се погледне зад мене. Еден од најпрометните булевари кој вообичаено е исполнет со колони возила, денес изгледа невообичаено мирно-глетка што може да се види само неколку пати во годината.
Ваквото темпо ќе потрае уште некое време. А со завршувањето на годишните одмори и почетокот на новата учебна година, кога учениците повторно ќе седнат во училишните клупи, а повеќето граѓани ќе се вратат на работните обврски, Скопје повторно ќе ја добие препознатливата градска динамика.
