Надлежните со полни раце работа и на вториот ден од прогласената кризна состојба поради пожарите. И денеска огнените стихии се активни на повеќе локации низ државата, а противпожарните екипи заедно со останатите служби продолжуваат со интервенции на терен.
Според последните информации на Центарот за управување со кризи, до 13 часот се регистрирани вкупно 13 пожари на отворен простор. Гори депонијата на Кванташки Пазар во Општина Гази Баба, а во село Страчинци во истата општина гори и ниска вегетација. Огнот зафати ниска вегетација и во село Маркова Сушица во Општина Студеничани, село Јабланица во Општина Струга и село Уларци во Општина Чешиново Обелешево.
Во меѓувреме, под контрола се ставени пожарите помеѓу селата Слатина и Грешница и село Долно Татеши струшко.
Охрабрувачки е што шест пожари во текот на денот се целосно локализирани и изгаснати. Меѓу нив се пожарите кај гробиштата во Драчево, депонијата во Визбегово, како и пожарите во Опила, Брвеница, селото Неготино во Врапчиште и на потегот Бурки- Долно Егри во битолско каде огнот опфати ниска вегетација.
Добра вест е дека сервисот на третиот ,,Ер трактор”, што беше оштетен во невремето во Скопје, успешно е завршен, објави синоќа дирекцијата за заштита и спасување. Во текот на денот бил извршен и пробен лет, при што било утврдено дека авионот е функционален. Кризната состојба заради пожарите ќе трае до 31 август. Надлежните се целосно мобилизирани и на располагање ги имаат сите капацитети. Апелот до сите е да се внимава и да се однесува одговорно бидејќи високите температури, ветерот и сувата вегетација создаваат услови за полесно избувнуување на пожари.