Вистинска драма се одвивала во раните утрински часови на улицата „Димо Хаџи Димов“ бр. 9 во Штип. Непознат сторител, пет минути пред четири часот, со багер удрил во куќата на браќата Сефери, а потоа избегал. Четириесет и двегодишниот Џингис Сефери, кој сè уште е во шок, раскажува дека тој и неговиот брат спиеле кога соседите почнале да им тропаат на прозорците, предупредувајќи ги дека некој ја руши нивната куќа. Од силните удари срушен е дел од куќата. За среќа, багерот удрил во ѕидот на просторија што не се користи, па нема повредени.
„Ние спиевме во куќата. Живееме со брат ми. Не разбудија соседите кои почнаа да ни тропаат на џамот и ни звонеа на мобилен, викајќи: „Станувајте брзо, ви ја срушија куќата.“… Не е ни од Бога, како што се вели. Удрено е двапати со корпата и право избегал“, изјави штипјанецот Џингис Сефери.
Сефери тврди дека куќата не е дивоградба и не знае причина поради која некој би се обидел да му нанесе ваква штета. Иако никој не е повреден, ударите предизвикале сериозни оштетувања. Напукнати се таваните и во просториите каде што спијат двајцата браќа. Според него, доколку багерот продолжел да удира, последиците би можеле да бидат фатални.
„На двете соби ми се оштетени таваните. Да речеме, имам околу 50 отсто оштетување на таваните“, изјави Џингис Сефери.
Увид извршија и инспектори од Општина Штип, при што е утврдено дека посочениот објект нема сопственик, но и дека браќата Сефери не располагаат со документи за сопственост. Целиот случај е сниман од безбедносната камера на соседите, а снимките веќе се предадени на полицијата.
