Скопје повторно добива лик достоен за главен град. За само осум месеци, Орце Ѓорѓиевски започна промени што не може да останат незабележани. За неполна година од својот мандат, со наследени проблеми и долгови до гуша, таткото на градот покажа дека треба само желба и волја за да се покажат резултати. Граѓаните велат дека ефектите од неговото работење се неспорни.
„За многу работи се потруди, ние сме задоволни. Си ја работи работата како што треба. Прават улици, пешачки патеки… Од се што е сработено сме задоволни.“– велат граѓаните.
Градоначалникот не губи време во остварување на ветеното. Започнати се проекти кои стагнираа со децении, се рушат дивоградби, се реконструираат улици, веќе постоечките редовно се мијат, а и хигиената е на високо ниво.
Се работи и на намалување на сообраќајниот метеж, Скопје ќе ја добие првата подземна сообраќајница кај „Лимак“. Аеродром и Гази Баба ќе се поврзат со мостот „Генерал Михајло Апостолски“, а од другата страна на градот, граѓаните од Карпош и Ѓорче Петров ќе можат да го избегнат метежот преку мостот кај Љубљанска. Улиците на кои имаше повеќе дупки отколку асфалт се трансформираат во модерни сообраќајници, а резултатите се веќе видливи кај Момин поток.
Еден од најголемите предизвици е јавниот превоз, затоа што последните автобуси беа набавени за време на градоначалникот Трајановски. До крајот на годината Ѓорѓиевски се надева дека ќе пристигнат нови 150 возила. Со цел граѓаните што помалку да ги користат своите автомобили, се работи и на брз рапид транзит систем што ќе сообраќа од Ѓорче Петров до Ново Лисиче, а дополнително скопјани ќе можат и да се вратат во вагоните како превозно средство со новиот градски воз.
Паралелно се работи и на нови паркови, зеленило, како и нови патеки за пешаци и велосипедисти. Скопјани ќе го добијат назад и Луна паркот, со нова современа опрема, проект кој ќе ја означи новата ера на семејна забава во главниот град.