Со порака дека слободата е наследена, но споменот на борците мора да се зачува, денеска во Дебрца беа одбележани 83 години од формирањето на Првата македонско-косовска ударна бригада. Покрај потсетувањето на нејзиниот борбен пат и жртвите за ослободувањето, во фокусот на чествувањето беше и потребата од обновување на спомен-обележјата и пренесување на историското паметење на помладите генерации.
Чествувањето започна во селото Сливово, каде што пред спомен-обележјето од Втората светска војна цвеќе положија делегации на Општина Дебрца, предводена од градоначалникот Златко Сиљаноски, на Сојузот на борци, Сојузот на ветерани и ОУ „Дебрца“.
Одбележувањето продолжи со посета на спомен-домот и положување цвеќе пред споменикот на паднатите борци од Народноослободителната борба и жртвите на фашизмот во Белчишта.
Градоначалникот Златко Сиљаноски ја истакна улогата на Дебрца во борбата за слобода и во поставувањето на темелите на македонската држава нагласувајќи дека обврска на сегашните генерации е да го зачуваат наследството од борците и да го пренесат на оние што доаѓаат.
– Нашите предци несебично ги дадоа своите животи за слободна Дебрца и слободна Македонија, за ние денес да можеме да живееме пристоен и слободен живот. Нам, како генерација, ни останува тоа наследство да го негуваме и чуваме, но и да оставиме трага по која ќе чекорат идните генерации почитувајќи ги овие историски настани и датуми – рече Сиљаноски.
Тој најави дека Општина Дебрца по три децении ќе започне со целосна обнова и уредување на спомен-собата во Сливово, како и вложувања во реставрација и одржување на историските спомен-обележја на територијата на општината.
– Жал ми е што тоа ќе се случи првпат по триесетина години. Требаше да наследиме уредени споменици и само да ги одржуваме. Сега мораме да ги обновуваме, а на идните генерации да им оставиме наследство за кое ќе се грижат. Ќе ја уредиме и оваа просторија со богато историско минато, за да остане спомен-обележје за сите нас и за оние што доаѓаат по нас – додаде Сиљаноски.
Првата македонско-косовска бригада е формирана на 11 ноември 1943 година кај селото Сливово, во атарот на Општина Дебрца. Броела 700 борци од батаљоните „Мирче Ацев“, Крушевскиот батаљон, Првиот косовско-метохиски батаљон „Рамиз Садику“ и Вториот косовско-метохиски батаљон „Боро Вукмировиќ“. Таа била многунационална воена единица, во чиј состав имало Македонци, Албанци, Срби, Црногорци, Словенци, Италијани.
