Над 250 хектари земјоделско земјиште, пасишта, овоштарници и пчеларници се претворија во пепел во големиот пожар што во петокот беснееше во пробиштипскиот регион. Зад огнената стихија остана опожарена површина еднаква на околу 350 фудбалски игралишта. Пожарот избувна во атарот на селото Бучиште, каде што целосно изгоре една куќа, а беа оштетени и неколку помошни објекти. Потпомогнат од силниот ветер, огнот потоа брзо се прошири кон атарите на селата Неокази и Ратавици.
„На настанатиот пожар во петокот, има зафатено околу 250 хектари. Главно се земјоделски површини, има нискостеблеста шума и пасишта, зафатени се пчелни семејства, овоштарници, житарици и дел од куќите во село Бучиште“, изјави градоначалникот на Пробиштип, Тони Тоневски.
Општина Пробиштип од денеска го отвори повикот за пријавување на штетите од пожарите. По истекот на рокот, на 15 јули, општинска комисија ќе излезе на терен за да ја утврди фактичката состојба и да ја процени висината на штетите.
„Ние како општина имаме формирано комисија која ќе треба да ја утврди настанатата штета и согласно правилникот што го има донесено Општина Пробиштип, ќе биде доставен до Советот. Понатаму ќе биде доставен до Владата, по што граѓаните делумно ќе бидат обештетени од оваа несакана појава“, изјави градоначалникот на Пробиштип, Тони Тоневски.
Минатиот петок беше еден од најтешките денови ова лето за Штип и Пробиштип. Во текот на денот избувнаа четири пожари, меѓу кои и оној на тврдината Исар во Штип. Според првичните индиции, пожарот во пробиштипскиот регион најверојатно настанал од искра предизвикана при работа на земјоделска машина.